عشقت البر

[هواوي يالحر]

ليا منه وطاني الهم رحت البر عصريّه

فرشت بساط ضيقي ثم جبت اغراض برادي

ذكرت الله وصرت ادعيه يرحم حال مبريّه

ورجيت انه يحقق مطلبي ومناي ومرادي

احس الضيق لا مني جلست بوسط بريّه

يهج وكن ماله في خفوقي مشرب وزادي

جلست بروضة ٍفاحت بها الأزهار عطريّه

خزامى واقحوان ونفل معهن وردة الكادي

قريب ٍ من نفود ٍ صابته زخات مطريّه

نفود ٍ جمّله ربي له الاقدام تنقادي

واذا جت حزة الليل ابتهجت بنور قمريّه

اسامر فيها نسمات الفرح مع صوت الانشادي

وشبيت الحطب والقدر تحته نار مذريّه

تطاول في لهبها لين يصبح جمرها هادي

عشقت البر واعطيته محبة صدق عذريّه

رميت بساحته حزني ومعه الضيق وسهادي

وتركت بوسطه بساطي وقصيدة ود ّ حصريّة

وفارقته فراق اللي يقل جت حزة رقادي

وقبل امشي كتبت حروف فوق الارض مقريّه

عسى الله يحفظ بلادي عسى الله يحفظ بلادي

[خواطر]

الله الله ،،~


صـح لسـآآن آلشـآآعر //

يـآهوآوي ،،~

ومنــوور بهـآلطــرح =)

يعطيــك آلف عـآفيته ....~

[همس]

جميل يالشاعر

ترجمت ذاك العشق بكل وجدانيه وبساطة حرف

صح الله لسانك

ويعطيك ربي العافيه

[المحرمـي]

وشبيت الحطب والقدر تحته نار مذريّه

تطاول في لهبها لين يصبح جمرها هادي


اسميني سويتها اول امس وطبخت ذبيحه عليه


صح لسان شاعرها
وصحت يمناك يهالواوي
يعل دارك حيااا

[هواوي يالحر]

يسلم على تفاعلكم وتصخين المواضيع

ويعطيكم العافيه

[أحب البر والمزيون]

يالله ماحلاها أيام البر وخصوصا في الشتى عاااد البر في الشتى غييييير
وربي احلى ايام اقضيها في البر ... روووح البر وركب الخيم وشب الضو والعب في الدرايات ع كيف كيفك
صح السانك شعارنا وتسلم ع الطرح الغاوي

[هند بنت علي]

عسى الله يحفظ ابلاادي


بجوها وبحرها وبرها


احسنت يالهواوي


أكرمك الله

[هواوي يالحر]

يسلم على مروركم